政情：阿基撞花琼車 「六隻眼睇到」
前日立法會停車場發生一宗小意外，有人目擊民協議員馮檢基（阿基）嘅座駕喺倒車泊車期間，「撞花」咗議員李慧琼（Starry）嘅座駕，事後不顧而去。雖然事後阿基賠咗四千元畀Starry了事，但佢強調無撞花Starry架車。據聞同場有三位議員嘅司機直擊成件事，究竟邊個版本先係真呢？
三議員司機目擊
不過，Starry黨友蔣麗芸（Ann）就爆料，話佢司機當時都目擊阿基架車撞花Starry座駕，同場仲有譚耀宗嘅司機同田北辰嘅司機，阿Ann話一共有三個人、六隻眼睇到，無理由一齊睇錯啩？雖然係咁，但人多又唔一定係啱晒嘅，睇怕除非有準確嘅閉路電視錄影片段，否則呢件事都好難搵到真相。
至於事件主角之一嘅Starry亦話，既然同阿基達成和解協議，就唔再追究喇。不過，講到阿基手車係咪麻麻哋，Starry就透露自己手車都唔好得去邊，因為佢○八年考取自動波車牌兩次先成功，之後到現時都未正式開過車，多年來只係做乘客喎。