每個人都有不為人知、不想人提及嘅過去。不過，若要人不知，除非己莫為，既然有做過當然唔可能奢望冇人知啦。一旦畀人知道可以點做？咪惟有勇敢面對囉！一出道就掀起話題嘅神室舞衣，正正勇於面對過去一段黑歷史，被人認為勇氣可嘉，廣獲支持，當然舞衣受人支持嘅原因仲係因為佢實在太迷人啦！
所謂有心唔怕遲，十月都係拜年時，其實好多人都係英雄遲暮，好似德國國家足球隊嘅名宿比亞荷夫咁，二十到尾至嚟發光發熱，打響名堂。成功攀上事業高峰係好多運動員嘅夢想，自然不論遲定早。而喺日本水着界唔少女優一樣好似比亞荷夫咁年近三十至出名，星野亞希、杉原杏璃就係好例子。甫出道就備受注目同議論嘅神室舞衣，亦係29歲至出道拍寫真。舞衣出道一年，家陣30歲嘅佢仍然美艷絕倫，簡直就係嬌艷不可方物，配合埋呢個年紀醞釀出嚟嘅女人味，認真係迷死人。舞衣嘅身材同樣令人驚為天人，一來肌膚雪白剔透，二來應大則大，應細則細，呈現出無比誘人嘅曲線美，從今以後小弟心中嘅水着女神又多一個喇！
神室舞衣令人驚艷嘅外在美，成功喺寫真界惹人注目，但係令大眾成為話題嘅卻係其過去。舞衣做寫真女郎之前，曾經喺東京六本木呢個夜生活繁盛嘅地方做過陪酒孃，由於招呼客人有道加上索得交關，令佢成為人氣第一陪酒孃。之不過，呢段過去只係舞衣出道以來公開嘅一部分，亦成為傳媒製造各種傳聞嘅基本材料。好多傳聞都未經其本人證實，例如話佢出身窮苦，父親因為公司經營不善欠下巨債；又話舞衣大個之後就結識到一個賤格男友，由20萬日圓借起，最後借到500萬，然後一蚊都冇還過。由於舞衣幫男友向財務公司借錢而欠債，就要到東京打工，第一站就係做陪酒孃，更成為人氣第一，一日之內吸金千萬日圓。以上傳聞信唔信就隨得大家，而可以肯定嘅係舞衣家陣人氣相當高，且鍾意協助女性成為理想女友，仲不時上綜藝節目教烹飪，又教女仔點樣同男友接吻等。
神室舞衣近期廣受綜藝節目歡迎，從其博客可以知道佢不時上節目擔任嘉賓，想知道舞衣又做埋邊個節目，可以Click上其博客。
網址：http://ameblo.jp/kamuro-mai/
年齡：30歲
身高：5呎2吋
三圍：34D-23-33
撰文：賢