中環出更：汕商新會長推介鄉味牛丸

Stephen提及家鄉美食相當興奮，佢話大家都知汕頭嘅獅頭鵝及鵝肝好出名，但係佢就大力推介牛丸及牛筋丸，仲話呢啲先係最正，每次佢返親鄉下必買喎！

張雲正遊日愛買西裝

當日出席嘅「家己冷」仲有潮州商會會長張成雄及兒子張俊勇夫婦，觀瀾湖集團主席兼行政總裁朱鼎健亦有到場。卓妮見到一位稀客，就係好少現身同鄉會活動嘅海關關長張雲正。佢啱啱去日本大阪旅行返嚟，回程時喺當地機場見到唔少港人帶一箱二箱零食返港，笑稱呢個場景令佢諗起一班內地水貨客喎！不過佢對食物冇乜興趣，反而鍾情行街買衫，盛讚日本西裝、皮鞋同眼鏡款式又多又靚，仲好耐用，Fit晒亞洲人嘅身形及輪廓咁話。

長實執行董事趙國雄都有到場，問佢擔唔擔心早前嘅反水貨客示威影響旗下商場生意，佢話只要商場通道夠闊落，相信都唔會造成危險。至於深圳前海打算設立港貨中心，佢坦言有興趣，不過需要了解更加多細節先。

講到汕頭商會未來發展大計，Stephen話現時正招募更多年輕成員，前排仲成立咗汕頭商會之友，方便凝聚更多唔同鄉下但有心互相支持嘅生力軍，大家一齊做好啲咁話。

張俊勇（左）偕太太陳慧苓（中）及父親張成雄現身同樂。

朱鼎健百忙之中抽空撐場。（葉華英攝）

卓妮