中西區遍地裂縫意外頻生
中西區馬路處處破損，市民步步驚心！有市民早前騎單車駛經荷李活道時因路面裂縫而失事扭傷，事後發現區內多處馬路路面破損，惟向路政署投訴卻未見積極跟進，擔心終有一日釀成嚴重意外。區議員指路政署近年年均接獲逾二百宗相關投訴，促請部門之間加強協調，以改善路面情況。
「啲馬路膠甩晒就露條罅出嚟，啱啱好夠食住個轆，搞到我失晒平衡，扭親右手手腕同條腰。」陳先生（化名）一直參與業餘單車運動，指去年騎單車經過荷李活道與鴨巴甸街交界時因前輪陷入水泥路面之間的罅隙而失事，由於該處人、車流皆十分繁忙，擔憂將釀成更多意外，遂再到事發地點一帶巡視，「呢區啲路面好多罅隙，對車輛嚟講好危險，仲有啲路段爛到有個窿，人、車行過都好牙煙！」
車輛駛經遭拋起
陳因「路見不平」而向路政署投訴，惟事隔半年事發地點方完成重鋪路面，質疑該署處理有欠積極，「踢一踢、郁一郁」，「差唔多拖咗成半年先搞掂，同一條街有其他位爛咗，佢哋都闊佬懶理咁。」記者曾沿貫通中、上環的荷李活道一帶實地視察，發現水坑口街交界路面滿布裂痕，而文武廟對出路段則由於凹凸不平，駛經車輛亦被相繼拋起，而近基恩小學對出路段馬路伸縮膠出現剝落，鄰近的四方街、皇后大道西路面亦出現破損。
路政署發言人表示，為配合混凝土冷縮熱脹的情況，荷李活道路面在適當位置設有伸縮膠，而投訴人單車失事的路段，則於去年七月接獲路面不平情況後已即時安排臨時維修，惟因交通繁忙，經相關部門審核獲批於周日施工，重建工作於去年九月展開，並於十二月完成，其後亦有安排承建商維修破損的伸縮膠。
小修小補欠效用
發言人續指，文武廟對出路段早前出現地下水管破損，水務署現正安排水管維修及復修路面工程，故已轉介該署跟進。
「都試過有個婆婆喺馬路戟親要送去瑪麗 （醫院），呢度有幾間小學又有醫院，擔心會有街坊出事。舊年同路政署反映，佢都話近年每年收到過二百宗投訴。」一直跟進事件的中西區區議會交通及運輸委員會委員蕭嘉怡指，路政署以「小修小補」方式處理投訴，不久又打回原形，惟署方往往擔憂需承擔後果而未有重鋪路面，「鋪路就會影響車流量及嘈到居民，所以佢都會拋番個波過嚟，問番區議員有冇必要去整。但其實佢應該同運輸、環保署同警方溝通好啲，睇吓點解決問題。」
記者︰呂耀焜