佔領行動歷時七十九日，有人話破壞香港引以為傲嘅法治精神。政府中人透露，一直係香港競爭對手嘅新加坡就乘機喺多個國際論壇唱衰香港，搞到政府都要急急變陣應對。
據聞佔領期間，新加坡喺多個海外仲裁會議發表睇淡香港言論，理由不外乎話香港政局因為佔領行動而不穩，更致命嘅就係香港人無視法律，尤其是之前有人倡議唔使遵守法庭嘅民事禁制令。據聞呢啲海外仲裁會議未必次次都有港府官員出席，所以唱衰者無所顧忌。不過有部分會議組織者係香港人，獅城官員呢啲言論好快就傳番嚟。聽聞港府檢討後，決定以後若有類似會議，都會盡量派出官方代表，實行睇實人哋。不過講到尾，最緊要都係要自己爭氣，咁人哋想點唱衰都冇彈藥啦！