政情：波斯大廚 巧製台牛肉麵
為咗慶祝台北國際牛肉麵節邁入十周年，台灣觀光局香港辦事處尋日特登請八位冠軍台灣牛肉麵大廚到港，一連三日喺荷里活廣場大騷廚藝。市民只需捐廿蚊畀港澳台灣慈善基金會，即可一嘗原汁原味空運到港嘅台灣金牌牛肉麵。
尋日下午舉行開幕禮後，台灣觀光局香港辦事處主任巫宗霖、中華航空香港分公司總經理傅小雯及港澳台灣慈善基金會永遠榮譽主席錢立祐等人，穿梭各攤檔逐一試味，現場香味四溢，聞到都流晒口水。巫宗霖話，由於香港舖租太貴，台灣業者計過條數，都係唔敢跨海來開分店。
加入中東佐料
八位金牌大廚之中，我哋發現有位「外國樣」嘅師傅阮大為，原來佢係伊朗人，到台灣定居廿幾年，仲娶咗台灣太太，難怪講起國語十分流利。
阮大為話，佢原本到台灣做生意，後來改賣牛肉麵，事關台灣牛肉麵係佢至愛美食，佢仲搞搞新意思，將波斯香料等中東佐料加入湯底添！