政情：白鴿內訌不止 AV仁圖滅聲
民主黨（白鴿黨）喺政改問題上愈走愈激，一方面反對按人大常委會「八三一」決定嘅政改方案「袋住先」，該黨立法會議員何俊仁（AV仁）又計劃喺立法會否決政改方案後辭職發動公投，推翻「八三一」決定。此舉令該黨內訌情況愈演愈烈。繼白鴿黨狄志遠同李華明表態支持「袋住先」、反對辭職公投後，該黨前立法會議員黃成智就再開炮，撰文批評堅決反對方案嘅黨友不合邏輯。已被激進派把持嘅白鴿黨就迅速出聲明反駁，重申該黨六位立法會議員都會反對「八三一」決定下嘅政改方案，AV仁仲密謀推出絕招「滅聲」添！
「應繼續同中央談判」
鮮有就政改議題出聲嘅黃成智話，如果否決政改方案，下任特首仍然會由小圈子選出，一個全無認受性嘅特首，又點會有動機修改「八三一」決定呢？佢話現時政府推行嘅政策已十分離譜，若選舉制度唔改，日後只會更離譜。
黃成智又話，唔少民主國家唔係只靠首長選舉，民主國會同公民參與亦至為重要，所以泛民應該繼續同中央談判。通過今次嘅方案唔只可以令香港處境唔再壞落去，亦可以喺後年特首選舉時，透過全民投票有效咁發動新一輪民主運動。佢喺文中仲兩次點名質疑取代佢出戰立法會新界東直選嘅白鴿黨總幹事林卓廷，話佢反對「袋住先」嘅立論不合邏輯。
白鴿黨尋日下午隨即發表聲明，重申該黨堅決反對「八三一」框架下嘅政改方案，除非中央肯重啟政改五部曲，訂出一個符合《基本法》同《公民權利和政治權利國際公約》嘅方案，否則該黨六位議員都會投反對票。AV仁就話，嚟緊嘅白鴿黨會員大會除咗會就係咪發動辭職公投表決，佢亦考慮提出一個否決「八三一」框架下嘅政改方案嘅議案，希望黨內有統一立場。如果呢個議案獲得通過，其他黨友再話支持「袋住先」，就等同違反黨紀。AV仁咁做即係要逼其他人封嘴，排除異己，相信此舉只會令白鴿黨內部撕裂更嚴重。