政情:興言逆耳 貪曾被余辱

基本法委員會委員陳弘毅日前建議就政改爭議舉行電視辯論,點知一石激起千重浪,繼政制及內地事務局局長譚志源重提當年幫「貪曾」前特首曾蔭權爵士搞電視辯論令佢「後悔莫及」後,工聯會立法會議員王國興(阿王)亦大爆當年喺建制派飯局中,曾力勸貪曾唔好搞電視辯論,可惜對方自信心爆棚唔聽人講,結果被對手、即「五區公投」總發言人余若薇狂砌一粒鐘,表現之差令人慘不忍睹,貪曾認真係忠言逆耳,自己攞嚟衰!

違上意間接承認五區公投

貪曾當年推銷政改方案搞到滿城風雨,除咗多次同官員落區做「起錨騷」倒政改米之外,最為人詬病嘅地方就係搞電視辯論。貪曾喺一○年五月致函時任公民黨(公文袋)黨魁余若薇,邀請佢喺六月中就一二年政改方案進行一場電視直播辯論,此舉隨即惹來各黨派不滿。民主黨同有份推動公投嘅社民連都唔滿意未有獲邀出席,建制派內亦流傳唔少陰謀論,包括質疑有關做法變相幫喺公投大敗嘅余若薇同公文袋翻身。中央講明唔承認五區公投,但貪曾竟然邀請余若薇時以五區公投總發言人身份稱呼余,被質疑係咪公然挑戰中央。

建制派流傳貪曾特登慘敗

結果一如所料,貪曾喺電視辯論嘅表現比外界預期更差,令其民望進一步插水,建制派甚至流傳佢係特登慘敗,焗中央出手打救政改,放行民主黨嘅區議會方案。事實上,當時五區公投缺乏民意支持,投票率亦只係得百分之十七點一,創下歷來立法會大選、補選、甚至區議會補選嘅最低紀錄,可謂慘淡收場,舉辦補選亦用咗大約一點五九億元公帑。所以貪曾嘅舉動難免惹人猜疑。

阿王話,佢由頭到尾都唔贊成、唔認同電視辯論,佢喺當年嘅建制派飯局中,曾力勸坐喺對面嘅貪曾改變初衷。一來貪曾冇乜辯才,二來係貪曾出名臭脾氣,容易黑面,無謂畀機會對手博表現翻身,可惜對方堅持己見。事隔多年,佢諗番轉頭,覺得貪曾可能真係想幫公文袋造勢,唔係點會咁蝕底都肯做。貪曾一直被指為港英餘孽,同泛民眉來眼去,Friend過打Band,陰啲陰啲幫手有乜出奇啫!

第一手消息請下載on.cc東網iPhone/iPad/Android/Windows Phone Apps