中環出更：學聯爛攤 羅冠聰獨歎
香港專上學生聯會（學聯）一眾領導，喺佔領運動期間係威係勢，但清場後就畀部分學生清算，批評學聯表現進退失據，財政同運作黑箱作業等，多間院校紛紛發動退聯公投。其中港大學生會早前已率先退聯，理大退聯關注組尋日亦啱啱收集到足夠學生聯署，稍後正式啟動退聯公投，令學聯面臨瓦解。不過周永康、岑敖暉等現屆學聯領導，過埋今晚就會任滿落莊，留低大堆蘇州屎畀下手羅冠聰執手尾。
換屆僅羅參選秘書長
學聯尋晚起舉行一連三日嘅周年大會兼換屆選舉，會議首先要通過相關財務報告，但由於係閉門進行，外界難以得知會內詳情，唔怪得之畀人批評黑箱作業喇！換屆選舉預計今晚先至進行，但暫時僅得來自嶺大嘅羅冠聰參選秘書長，九成九可以自動當選，同部分立法會功能界別選舉一樣缺乏競爭。
對於退聯學生提出嘅改革訴求，包括公開據悉有多達一千萬元嘅緊急儲備基金帳目、為基金董事轉名，以及一人一票普選秘書長等，岑敖暉回應話希望新一屆學聯領導層可以回應到，即係推畀下手喇！
卓妮