政情：今日你上鏡：陳恒鑌幫襯台非法美食車

香港係咪倣效外國引入美食車成為近期熱話。立法會議員陳恒鑌（Ben）早前放假同屋企人去台灣墾丁旅行，見到有架美食車賣緊當地出名嘅火燄咖啡，即興致勃勃幫襯，點知同美食車老闆傾開至知，呢架美食車係非法經營。阿Ben話，嗰位小販知道香港考慮引入美食車，覺得好羨慕，皆因台灣仍未有美食車發牌制度，檔主只能偷偷地做生意，若被捉到就要罰錢。阿Ben力撐引入美食車，認為只需解決交通同衞生問題，美食車勢吸引唔少市民同旅客光顧，分分鐘會成為另類嘅旅遊景點。