中環出更：廢嶽續死撐開位 賴政府要求
人稱「廢嶽」嘅食物及衞生局前局長周一嶽（周一鑊），自前年獲政府「翻閹」出任平等機會委員會（平機會）主席後，依然連番被爆大鑊。最新一鑊就係佢喺未充分諮詢其他平機會委員嘅情況下，自行建議加設一個月薪逾十六萬元嘅營運總裁職位，幫佢分擔大量行政工作，預計每年最少增加近二百萬元公帑開支，但佢自己就一毫子人工都唔使減。周一鑊尋日出席活動時就繼續死撐，卸責話係應政府要求研究開位喎！
自己減薪？ 隻字不提
周一鑊話，○六／○七年審計報告及立法會政府帳目委員會已要求平機會聘請營運總監，政府亦批咗撥款，只係職位一直懸空。現時平機會確有唔少工作需要負責統籌嘅領導層做內部研究同分析，所以先重新考慮政府當年提出開位嘅建議，仲話政府過去都有追問平機會究竟幾時開位喎！講就係咁講，但班議員都提出過，當平機會增設行政總裁分擔行政工作後，周一鑊好應減人工，唔減人工就等於開位「自肥」，唔該佢下次正面回應呢個問題。
卓妮