中環出更：謝偉俊陶淵明着同款衫？
北京兩會期間，有人聯名建議制訂統一嘅中式禮服作為「國服」，仲建議國家領導人帶頭穿着添！點知呢股國服風話咁快就吹到嚟香港，立法會議員謝偉俊（Paul）尋日率先身穿絲質長衫現身立法會。佢話呢套先係正宗國服，魏晉詩人陶淵明都係着呢款衫喎。古人陶淵明着咩衫佢都知？卓妮只知「陶淵明獨愛菊」，而且為人節儉，衫都唔多件。
議員王國興（阿王）都覺得推行「國服」係好建議，事關香港天氣又熱又潮濕，着西裝真係「有苦自己知」，所以中國人點都要一套國服，仲話中山裝都係一個唔錯嘅選擇。
咁女性冇理由着中山裝掛？佢就話其實女性都有好多選擇喎。不過，阿王平時習慣一身工人Look，以牛記笠記示人，唔通佢真係會着國服？
至於議員鍾樹根點睇呢？佢就話唔需要硬性規定穿着國服，皆因香港華洋雜處，着衫視乎個人喜好同場合，所以好難有一套特定嘅服裝。如果要樹根揀，佢就覺得由清裝改良而成嘅棉衲都唔錯，而女性就可以着旗袍。
卓妮