其實范太今年已經年屆七十歲，做埋今屆人大常委就到七十二歲。范太話，下屆唔會再參選人大選舉，更加唔會再擔任人大常委。唔少人大都七十幾歲繼續做，點解范太突然要退下火線？佢就解釋內地人大選舉有「七上八落」不成文規定，即係年過六十八歲就唔會再參選，咁佢都要尊重制度。
否認被勸退
范太突然間話唔再玩，令外界猜疑係咪因為年紀大咁簡單。范太就多次澄清，唔選人大屬於個人決定，同人大「八三一」框架決定無關，亦同特首梁振英關係好與壞無關，又否認被中央勸退。不過，政治圈子空穴來風、未必無因，睇怕要靠其他權威消息人士爆料先至能夠再知多啲嘞。