我哋早前寫過，青年事務委員會現任主席陳振彬六年任期將滿，據悉政府想搵番一個真正嘅青年人接棒，目標包括已故全國政協副主席霍英東嘅長子嫡孫、香港青聯主席霍啟剛，但據聞啟剛對呢個位興趣不大，亦有人認為喺中央三令五申要香港加強青年工作嘅前提下，應該搵一位更有多方面經驗同「好打得」嘅人出掌青委會。有傳最新熱門人選只剩低兩位，一為菁英會創會主席施榮忻，另一為華人置業主席劉鳴煒，並以後者暫時看高一線。
消息指出，劉鳴煒雖然並冇做過青委會或其他青年組織，但近年佢獲上屆同今屆特區政府重用，先後委任咗做扶貧委員會委員、海洋公園副主席，成功洗脫富二代形象。加上佢本身有搞開智庫，並且有落手落腳做政策研究，對香港青年人近年最關注嘅房屋土地問題尤其熟悉，「空降」做青委會主席應該冇乜難度。
青委會尋日聯同港府合辦青年高峰會議，其中一節就搵咗劉鳴煒做講者，唔知係咪特登畀佢熱下身。講番呢個高峰會，原定係喺去年底舉行，但因佔領行動而延至尋日，原本身在北京開緊全國人大會議嘅陳振彬，亦都專程由北京趕返嚟，「好頭好尾」主持埋佢任內嘅最後一場峰會。