- on.cc 東方互動主頁
- 5月13日 (二)
尋日立法會工務小組委員會開會，討論各項建造工程嘅開支，包括城市地下空間發展。人民力量陳偉業（大舊）發言時，批評政府規劃混亂，「唔知聽到邊個陳福水嘅意見」，又指政府官員「畀二打六政棍牽住鼻子走」。點知大舊呢番言論引起民建聯蔣麗芸（Ann）不滿，皆因佢誤以為對方鬧民建聯係政棍，仲以為真有個政棍叫「陳福水」添，引嚟哄堂大笑。
唔知係咪新年氣氛仲未過，尋日開會時阿Ann好明顯不在狀態，一聽到大舊提及民建聯同政棍字眼時好敏感，以為大舊鬧緊佢黨友，即刻引用議事規程要求對方解釋。大舊隨即澄清話，政棍係指要喺灣仔、銅鑼灣搵地下城做研究嘅人，唔係鬧喺邊境搵地搞購物城嘅人，「喺邊境做嗰啲就發大財，好似陳福水咁亂點人起地下城就係政棍」。主席梁家傑就笑笑口「抽水」話，理解大舊口中嘅政棍係「陳福水」。點知阿Ann以為真有個人叫「陳福水」，仲問側邊嘅人邊個係「陳福水」，霎時間官員及議員笑成一片，認真搞笑。
卓妮
| 人人做記者 爆料方法 : | 爆料熱線： | (852) 3600 3600 | 電 郵： | news@opg.com.hk | 網上爆料 |
| 傳 真： | (852) 3600 8800 | 手機網站： | m.on.cc | ||
| SMS： | (852) 6500 6500 | MMS： | ireport@on.cc |
