中環出更：議員玩問答Game 表現得人驚
立法會尋日舉行新春午宴，一眾高官、行政會議成員都有出席，仲齊齊玩問答遊戲，唯獨泛民主派議員杯葛缺席。不過，被抽中玩遊戲嘅議員同官員表現都差強人意，第一輪問答環節中，兩隊都係四題選擇題先答中一題，到第二輪搶答環節時班議員仲大比數落後，五條選擇題先答中一題，真係（火羅）爆！
代表議員上台玩遊戲嘅係鍾樹根、王國興及廖長江，而官員隊就由海關關長張雲正、勞工處處長唐智強及行政會議成員張志剛上陣。首輪問答環節，兩隊要各自答四條問題，但官員隊只係答中有七位議員屬羊嘅提問，對於本港去年全年平均氣溫、上年度立法會會期開咗幾次會議，以及有關立法會藝術品嘅問題都唔識答。
立會春茗 兩「國」示威
議員隊嘅表現亦同官員隊不相伯仲，佢哋成日批評政府解決唔到本港房屋問題，但竟然連施政報告預計一五/一六年度嘅公屋落成量都答唔到，真係唔知佢哋有幾關心房屋政策喇。
去到搶答環節，王國興次次未等司儀問完問題就搶住舉手，咁茅梗係唔算數啦；但到司儀問完，佢又唔夠張志剛快手喎，結果議員隊只搶答到一條有關立法會上年度通過議案數目嘅問題，仲要係出動到遊戲嘅「請槍」錦囊，請咗秘書長陳維安「幫口」先至答中。結果三套、每套五件嘅仿皮文具套裝禮品就落入勝出嘅官員隊手中，議員隊只得環保購物袋及保溫杯作安慰獎。
除咗遊戲環節，長毛梁國雄同范國威亦「踩場」示威，分別準備咗「誠實豆沙包」同題為「臨崖推狼」嘅水墨畫畀出席春茗嘅特首梁振英（CY）做「賀年禮物」，但CY就全程冇理會佢哋。長毛就叫主席曾鈺成唔好信CY講嘢，仲話CY祝佢身體健康、開工大吉都係假喎。
卓妮