繼上兩星期「光復屯門」及「光復沙田」後，又有網民號召嚟緊周日「光復元朗」，去元朗反水貨客。十八鄉鄉事委員會主席梁福元尋日喺電台節目話，元朗接近邊境地區，買嘢方便，該區好歡迎旅客嚟購物，維持秩序嘅責任就交畀警方。對於有該區居民指，依家食碗麵都貴過以前，梁福元就話：「貴咪搵啲平嘢食，唔啱就買啲（餸）返屋企煮，或者要求老細加人工」。佢又話，冇理由蝕本做生意，叫大家勤力啲賺錢喎。如果梁福元嘅員工要求加薪，唔知佢又肯唔肯呢？抑或叫員工慳啲使呢？
