政情：釋智慧初八先做佛聯會長
早前香港佛教聯合會爆出選會長爭議，有人不滿未經正式選舉，就疑似內定會長一職由臨時署任會長、寶蓮禪寺方丈釋智慧法師擔任，而佛聯會近日出版嘅刊物及網站亦已率先將智慧法師列明為會長，而年資較耐的前首席副會長永惺法師則為榮譽會長，結果惹來爭議。智慧法師前日（年初五）就低調話自己仲未係會長，初八先至上任喎。
話說去年十一月佛聯會前會長覺光法師圓寂，因此要改選會長，並由釋智慧臨時署任會長一職。直至上月中，董事會終於正式通過會長由智慧法師擔任。前日我哋喺佛聯會舉辦嘅「念．覺．祈頌吉祥大會」暨覺光法師慈善基金活動上，見到場刊同印刷物已經將智慧法師列明為會長，梗係要問問智慧法師有咩感受同抱負啦，佢就話：「暫時未係會長，初八先至係！」