政情：財會主席人工嫌少
立法會議員月薪已經有九萬元，兼任立法會主席及內務委員會（內會）主席人工就更高，但兼任財務委員會（財委會）主席嘅人工就只係同普通議員一樣。近年開財委會都要坐足幾粒鐘主持會議，應付泛民主派議員打「拉布」戰，少啲精力都唔得。財委會主席張宇人（Tommy）尋日就大呻，質疑內會主席經常「行行企企」，點解人工可以高啲，所以財委會主席好應該加番多啲人工，否則好唔公平喎！
指要不時加班
按照現行規定，所有立法會議員月薪都近九萬元，而主席一職就可獲「雙工」，即係每月約十八萬元，至於內會主席有時要頂上做「代理主席」，所以薪酬方面係「工半」，即係大約十三萬月薪，但財委會主席人工就冇多到嘞。其實呢個做法保持咗好多年，因為財委會主席以往工作量唔多，逢周五開會好快就可以鬆人，只不過係幾年前「拉布」戰興起，財委會主席先變成重要角色。
現收普通議員價
現時擔任財委會主席嘅Tommy，就話呢個做法應該改變，因為財會主席不時要加班，尤其係近年行政立法關係咁緊張，有時佢主持會議坐到「屁股都扁」，工作量同以前相差幾倍，相對內會主席好多時「行行企企」就得，無理由內會主席可以攞多啲人工，但財委會主席只係攞普通議員價。其實今次Tommy呢個要求唔算過分，睇嚟佢平時受埋好多冤屈氣喎，但點解吳亮星在位時又冇提出呢？
大家要留意，雖然Tommy話內會主席「行行企企」只係針對個職位，但咁啱坐緊呢個位嘅就係對家經民聯議員梁君彥，好難唔令人聯想佢係咪喺度寸緊人呢？講開又講，與Tommy同屬自由黨嘅田北俊（田少），去年辭職唔做黨魁變做普通黨員，點知最近又有新職務，擔任最近成立嘅「選舉策略委員會」召集人，即係佢會負責搞選舉策略。該黨預計今年底區議會選舉會派出廿幾人參選，目標係贏取十七席。