中環出更：麒麟現身 葉劉願握手
行政會議成員兼立法會議員葉劉淑儀喺年初二車公誕被「靈獸」麒麟「襲擊」撞飛至幾乎跌低，引發全城「抽水」潮，難得葉太唔介懷。不過，麒麟嘅真身、灰窰下村村民謝立元事後失蹤多日，一度有傳佢着草避見外界，謠言滿天飛。不過，麒麟先生尋日終於現身，佢接受傳媒訪問時話葉太當日企錯位導致意外發生。而我哋翻睇當日影片，謝立元舞的麒麟撞飛葉劉後，即時換了一名身形肥胖的男子頂上，謝則走上前方負責指揮舞麒麟。
謝立元話，舞麒麟咁樣撞人法，咁多年未試過，咁撞法，葉劉唔係幾好運喎。不過，卓妮問番葉劉，佢依舊豁達亦唔信邪，坦言係第一次出席車公誕儀式，對點樣企位真係冇認識，自嘲可能真係企錯位都未定，仲話唔介意同麒麟先生見面握手，仲希望澄清一切有關對麒麟秋後算帳、麒麟有意撞飛葉劉等傳聞添！如果係真嘅話，卓妮好期待呢個咁精彩嘅場面。
政界「抽水」不斷
事隔多日，對麒麟「襲擊」人類嘅「抽水」潮仍未結束，好似立法會議員梁志祥尋日出席團拜活動時話，根據圍村嘅說法，「麒麟」是神獸，畀人嘅印象係唔會同人「接觸」，如果同人「接觸」到，對方就會得到神獸庇護，「守護佢先至接觸佢」，又話「掂到人好神奇，所以葉劉會被守護。」不過，今次葉劉係被麒麟「撞飛」而非「接觸」，情況會否不同呢？
另外，自由黨尋日舉行春茗時，有人言談間又提起葉劉被麒麟撞飛單嘢，該黨青年團主席李梓敬即到附近便利店買「麒麟啤」款客「抽水」。李梓敬話，自由黨係中堅中立嘅政黨，如果有黨派立場「太左」或「太右」，該黨都會好似麒麟咁撞開呢啲政黨喎。該黨立法會議員田北俊亦笑笑口「抽水」︰「啲啤酒唔凍嘅？唔知係咪麒麟火氣太盛？」
卓妮