政情:長毛梁美芬「對嘴」惹爆笑

立法會資訊科技及廣播事務委員會尋日開會,當討論到亞洲電視近期欠薪同續牌發展時,一向係亞視擁躉嘅議員梁美芬就趁機會對堅持冇糧出嘅創作人專業表現表示欽佩。佢又話自己係《感動香港》評判,仲係亞視觀眾,跟住又數白欖講咗好多個亞視節目名,質疑「怎能話冇創作?」,又話唔可以「喺傷口上插刀」,只係股東唔爭氣,可惜制度上罰唔到佢哋喎。

緊接發言嘅梁國雄(長毛)就唔多認同喇,佢話亞視根本冇創作,只係得新聞節目係自家製作,但新聞節目唔係創作,「唔好侮辱員工」咁話。梁美芬就抵唔住頸話:「你有冇睇ATV?你又冇睇(又話人)」。長毛反駁話:「留低嘅人只係怕搵唔到食、冇糧出」,之後爆出一句:「我都唔想對嘴!」

「對嘴」除咗解作嗌交外,仲有另一個含意,班議員即時爆笑,連主角梁美芬都用手撥一撥否認,爭在未講聲「啋」啫!委員會主席葛珮帆都「抽水」話:「我諗梁委員(梁美芬)未必想同你(長毛)對嘴」,之後總算緩和吓緊張氣氛。

第一手消息請下載on.cc東網iPhone/iPad/Android/Windows Phone Apps