政情：公民講場：議員側側膊「立」即減工時

立法會宣布三月起實施「減工時」方案，如果周三大會當晚未能喺十點前完成，會議將由原定晚上十時結束，提早至八時完結，未審議嘅議題將留待周四再續，即係變相提早兩個鐘「收工」，但議員每月就照出九萬多元薪酬。不過，有關建議從未諮詢過市民，早前就火速喺內務委員會高票通過，泛民及建制派都支持。其實有關建議係為咗減少因議員早退或唔開會而出現嘅流會情況，但就包裝到好似為咗減輕秘書處嘅工作咁，好彩立法會主席曾鈺成早前澄清有關方案係議員提出，否則市民真係蒙在鼓裏，連議員「自肥」都唔知。