政情：白鴿 港府鬥幼稚
民主黨（白鴿黨）定於本月廿七日舉行二十周年黨慶，原本只係該黨圍內嘅事，但該黨就將官員係咪出席嘅問題無限擴大。而政府又好無聊咁透過唔同渠道同該黨鬥法，話官員堅拒出席撐場，搞到滿城風雨。由此可以睇到白鴿黨同政府有幾幼稚，幼稚鬥幼稚，連小學雞都不如。
白鴿黨因為佔領行動，推遲黨慶至本月底舉行，但未搞已傳出好多是非，早前該黨放風話邀請咗好多政府高官出席，但無乜人肯去，似暗示有政府中人想同白鴿黨搞對抗，仲將件事扯到去政府擔心幫該黨籌款搞變相公投。結果一眾高官成為追訪對象，最後問到曾經擔任該黨副主席嘅運輸及房屋局局長張炳良話應承咗會出席。
肥仔明：等同向該黨開戰
點知事隔幾日，前日網站《港人講地》就大鑼大鼓咁話有獨家消息，指張炳良將會缺席白鴿黨黨慶，令原本已經冷卻咗嘅小事，再次被炒熱。負責幫白鴿黨籌款嘅黨內元老李華明（肥仔明），尋日就喺電台大吐苦水，話如果政府決定缺席黨慶，等同向該黨「兜頭淋冷水」同「開戰」，令雙方關係進一步陷入低潮，好似小朋友玩泥沙咁喎。
阿炳淪磨心 想去冇得去
至於點解班高官要缺席該黨黨慶，尋日又傳出另一版本，話說三年前梁振英上任特首後，打算請全體立會議員食飯，但當時反國教風波群情洶湧，該黨講到明唔想一味風花雪月兼浪費時間，所以拒赴會。聽聞就係呢個原因，今次政府決定「回禮」，缺席白鴿黨黨慶。
不過，當初白鴿黨話要喺議會內搞不合作運動，但點解又邀請班官員出席黨慶呢？究竟該黨想合作定不合作呢？事件可以睇到，實情係白鴿黨同政府好似幼稚園學生咁玩緊泥沙，而張炳良就慘成被玩嗰堆沙咁，想去又唔准去，認真被玩殘。至於話會跟大隊嘅食物及衞生局局長高永文，如果政府大隊唔去，睇怕佢都唔敢私自出席白鴿黨黨慶嘞！