政情：中環出更：瑪利諾90周年校慶 盆滿缽滿
舉辦咗兩年嘅瑪利諾修院學校盆菜籌款宴今年又添食，籌委會成員之一嘅民政事務局前常任秘書長李麗娟（媽打）夠號召力，今年破晒紀錄開夠一百二十圍，合共籌得一百五十萬元。多位名人校友齊話當年，立法會前秘書長吳文華（Pauline）就大爆當年為學校奪得第一屆中文辯論比賽冠軍。
適逢該校九十周年校慶，新舊校友濟濟一堂，操場座無虛席，除Pauline外，財經事務及庫務局前副局長梁鳳儀、小學部校監余黎青萍及大新銀行主席王守業夫人嚴君琴等齊捧場。Pauline憶述，當年由德望中學轉到瑪利諾讀預科，即以隊長身份帶隊參加中文辯論比賽，成功砌低多間名校奪冠，可惜佢畢業後未有投身法律界，否則睇怕今日已做咗金牙大狀。
圍數爆燈 校友爆場
拍心口贊助逾百圍盆菜嘅保良局副主席蔡李惠莉，就帶埋大女蔡加敏、女婿馬鴻銘及孫兒亮相。原來佢女兒蔡加怡係舊生，當年蔡太日日去接放學，諗起依然好回味。同樣令人回味嘅，就係民政事務局前常秘楊立門與歌星韋綺姍即興唱番首《相逢何必曾相識》，引來台下唔少尖叫聲。
搞手「媽打」話，盆菜圍數爆晒燈，喜出望外，但佢轉頭幫中文大學籌款，就無咁順利喇。佢話自從佔領行動後，唔少大孖沙對班大學生好有意見，捐錢意欲大減，但佢話唔放棄，會迎難而上，落力游說喎。
卓妮