以前香港有句歇後語叫「新澤西」，意思係「食水深」。話說五十年代美國主力戰艦「新澤西號」訪港，由於噸位太大，食水太深，被迫停泊喺鯉魚門外，呢句歇後語由此而來。其實，維多利亞港停泊十萬噸巨輪都冇問題，而新澤西號仲未夠四萬噸，無理由停泊唔到嘅，所以，講到食水深咯喎，「新澤西號」睇怕遠遠唔及本港油魔。
呢，消委會過去兩年跟進本港五間油公司嘅情況，發現有加快減慢嘅迹象，導致零售價同原油價嘅距離愈拉愈遠。究竟點樣加快減慢呢？消委會舉咗兩段時間為例，前年上半年，油公司調升牌價只較原油價格上升滯後四日，而舊年下半年，油公司調低牌價較原油價格下降足足滯後八日，而且減幅相對較小。即係話，油公司唔止加快減慢，仲加多減少添，唔怪得國際油價累積跌咗近五成四，而本港零售牌價僅下調兩成四，兩者差距兩年來擴大咗百分之八點七，創下多年新高。你話嘞，油魔食水究竟有幾深吖？
消委會話喎，已經將調查結果交畀競爭委員會考慮，希望政府同油公司提升透明度，公布更多資訊。而油公司就聲稱汽油進口價只係定價嘅其中一個因素，仲要計算折扣優惠、保險、地價、安全環保等運作成本喎。嗱，呢啲咪就係狡辯囉，無論點樣計算其他成本，本地牌價同國際油價嘅距離都無理由愈拉愈遠。
話時話，油價加快減慢早就唔係新聞，好多人可能已經麻木咗，依家連消委會都睇唔過眼，咁就真係新聞咯，證明油魔肆虐，已令人忍無可忍。正所謂，冰凍三尺，非一日之寒，油魔食水愈來愈深，皆因港府放任自流。係人都知，本港油價一直高踞世界前列位置，就算扣除燃油稅，亦遠遠貴過歐美以及日本、新加坡等國家，運輸業界叫苦連天，不斷要求港府正視問題，加強監管，點知當局一直闊佬懶理，甚至充當油魔代言人，否認加快減慢，聲稱呢啲係商業行為喎。業界無可奈何之下，曾多次發起「餓死油魔」行動，結果油魔唔止冇餓死，反而愈養愈肥添。
當然，港府唔係完全冇做過嘢，曾聲稱要加強監察，包括喺網上公布車用燃油進口價同零售價，對比新加坡嘅離岸價，可惜有姿勢無實際，呢啲花拳繡腿根本嚇唔到油魔。老實講吖，就算唔計加快減慢呢一筆，油公司次次都係共同進退，價錢一樣，已經有合謀定價嘅嫌疑喇，港府咁都奈佢哋唔何，仲唔係無牙老虎？既然咁都得咯喎，就算有競爭條例都係嘥氣咋！