政情：八網難逃：克勤變克群 橫額鬧笑話

有網民今個星期二喺社交網站貼圖，見到民建聯（民記）同新界社團聯會張貼宣傳橫額，支持政改方案，但橫額標示大埔區議會主席張學明及新界東立法會議員陳克勤，竟然誤植陳克勤為陳克「群」。網民講笑話「民建聯／特區政府鄭重宣布「陳克勤」已死。根據遞補機制，現在由「陳克群」接任，避免觸發補選，以節省公帑」。有網民話，尋日凌晨相關橫額已被移走。身在廈門開會嘅克勤解釋，因為內地製造商出錯，聲稱「勤」同「群」嘅普通話同音所以搞錯，而製造商亦已向民記發道歉信。不過，呢個解釋有啲牽強，事關兩個字係唔同音嘅，內地搞錯就更加講唔通啦，況且送貨都會驗收啩？