佔領行動後，政府一直都諗緊點樣處理青年人嘅不滿，除咗喺施政報告建議成立「青年發展基金」，亦有唔少人建議吸納年輕人等代表，加入政府諮詢組織。
作為政府大腦嘅中央政策組，最近都密密搵咗唔少人擔任特邀顧問，除咗我哋之前講過嘅離島區議員周浩鼎及香港大學教授關品方外，原來中策組上月下旬又再委任多三名特邀顧問，其中包括人民力量主席袁彌明兄長袁彌昌。
獲邀嘅三人分別係黃醒華、袁彌昌及王沛詩，驟眼睇未必知道佢哋底細，但搵多啲資料，就知道佢哋都算有來頭。首先黃醒華係喺七十年代學運「火紅年代」時，做過學聯會長。而袁彌昌就係港大政治與公共行政學系名譽助理教授，主力研究國際關係；而據聞佢同妹妺袁彌明嘅政見都唔多相同。其實政府點解唔直接搵學聯中人或激進泛民加入呢？呢方面唔使畫公仔畫出腸都知喇。至於王沛詩係任職大律師、港大校董會成員，仲係中華總商會立法會議員廖長江嘅太太。