政情：激進當道 溫和鴿離巢
民主黨（白鴿黨）去年底選出新一屆領導層，據聞一班喺黨內營營役役多年而冇得上位嘅成員及溫和派對領導層被激進乳鴿佔據覺得不是味兒，加上該黨路線愈行愈激，令唔少黨員都萌生退意。繼早前該黨老鴿張賢登及元朗區議員鄺俊宇雙雙退出中委職務後，近日又傳該黨嘅葵青區議員周奕希、林紹輝及曾被已故黨主席司徒華（華叔）力捧嘅乳鴿李耀基都想退黨。相信如果該黨繼續行事偏激、堅決否決政改、發動辭職公投嘅話，將會令更多黨員心灰意冷，隨時加劇逃亡潮。
白鴿黨領導層換屆之後，該黨南區區議員羅健熙、區諾軒、柴文瀚及有「峯鴿」之稱嘅中西區區議員許智峯都成功上位，凸顯該黨由青年激進乳鴿當道，一班溫和派及喺黨內十幾二十年都冇得上位嘅中老鴿自然心有戚戚然。該黨路線愈走愈激，一早揚言要杯葛政改第二輪諮詢及否決政改，有「AV仁」之稱嘅前黨主席、立法會議員何俊仁又話要發動辭職公投，仲開始偏重本土論述，同最初華叔所行嘅愛國民主路線相比，已經有所偏離，故此近日接二連三傳出有白鴿退黨嘅消息。
「耐咗想轉身份」
○六年曾申請退黨嘅周奕希可以話係典型嘅溫和派，佢尋日就親口證實喺上月已經提出退黨，黨已經處理緊佢嘅申請。周奕希坦言，佢喺白鴿黨已經好多年，「耐咗想轉個身份」，又話自己做嘢好認真，退黨亦唔係一時三刻嘅決定喎。至於退黨後仲會唔會選區議員，周就話兩者冇直接關係嘅。而同屬葵青區議員嘅林紹輝亦冇斷然否認退黨傳聞，只係話唔回應，有咩嘢黨會公布咁話。
至於曾受華叔器重嘅李耀基，雖然喺一一年同一二年都分別參選過區議會及立法會選舉，似係有望上位，但近日亦傳出有關佢嘅退黨申請，但我哋就聯絡唔到佢，無法證實喇。其實白鴿黨近日不斷有成員決定淡出同退黨嘅消息，睇嚟佢哋都好應該檢討吓未來路向至得喇。