中環出更：林筱魯驚古井從天降
早前我哋喺一個酒會上見到古物諮詢委員會主席林筱魯（Andrew），記得多年前佢曾經講過，香港地上無椰子，地下無石油，即係冇乜天然資源，所以勸喻港人要靠自己。點知去年港鐵沙中線土瓜灣站近宋王臺地盤，就掘到無價嘅宋元古井等歷史寶物，即係香港地下有唔少寶藏啦！Andrew聽完笑笑口話，自己腳頭唔好，好驚遲啲又有古井從天而降喎！
被陳智思笑腳頭唔好
本身係都市規劃師嘅Andrew，兩年前接替行政會議成員陳智思做古諮會主席，適逢香港保育意識高漲，Andrew要處理嘅古蹟保育爭議多好多，除咗古井外，仲有山頂盧吉道大宅改為酒店一事，每件事都遇上好大爭議，處理過程中亦飽受批評，認真吃力不討好。Andrew自嘲話，連陳智思都笑佢腳頭唔好添！講起古井善後問題，Andrew話事件已過去，依家要向前看。至於盧吉道大宅，社會應以保育角度出發去睇件事。
卓妮