中環出更：林煥光倦容開餐偏食真冇益
香港人生活節奏急促，經常食無定時，早前有日下午大約四點鐘，卓妮行經金鐘海富中心商場，見到行政會議非官守議員召集人林煥光（WK）現身一間快餐店，個樣好疲倦。WK速叫一碟韮黃炒麵及熱飲，不過起筷第一件事係逐條揀走啲韮黃唔食，然後唔使五分鐘就食晒碟麵走人，睇嚟好肚餓又好趕時間，唔通佢忙到連午飯都未食？
當日WK步履輕慢行入餐廳，先喺水牌前望一望，然後到收銀處畀錢落柯打，到櫃位畀飛後，就攞咗杯熱飲及號碼籌坐低靜候。見佢坐定後就除低眼鏡閉目養神，期間不時用手輕捽雙眼，又拎張紙巾出來抹眼水，個樣勁攰。
揀走韮黃 浪費營養
冇耐侍應將一碟炒麵送到，WK拿拿聲拎起筷子，但唔係即刻開餐，而係慢條斯理咁逐條揀開韮黃擺埋一邊，揀到咁上下，佢先至大啖大啖食，不消幾分鐘就搞掂，然後起身離去。當日唔係星期二，又唔使晨早流流開行政會議，唔知佢忙緊乜嘢，搞到個人冇晒精神，又唔知趕去邊呢？
講開又講，WK唔食韮黃認真失策，一來大庭廣眾揀飲擇食教壞細路，又唔啱惜食潮流，如果被環境局局長黃錦星見到，實要話佢兩句。
其實韮黃含有多種礦物質，營養豐富，對眼睛及提升人體免疫力都有益處。從中醫理論來講，韮黃亦具有健胃、提神及保暖功效。當日所見，WK眼攰又精神欠佳，應該食多啲韮黃至真。
卓妮