政情：中環出更：當家唔易做 痹辛有誰知
做得當家，除咗要有一套管理之道外，仲不時要四圍飛忙個不停，想分配時間休息都唔容易，令健康響起警號。卓妮前日喺一個電台節目活動中見到四洲集團創辦人戴德豐千金戴凱欣（Kennis），佢就話早前突然覺得右手麻痹，揼骨按摩都冇用，後來去做全身檢查先發現係頸椎有少少移位，經過脊醫幫佢做咗幾次治療後先好番啲。
「低頭族」戴凱欣頸椎移位
Kennis話，佢照過Ｘ光後，知道隻手麻痹嘅真正原因係工作時姿勢唔正確或做得太多「低頭族」，令頸椎移位，因為部分神經受壓，所以咪成隻手都痹囉。佢形容，早前連舉高隻手化妝畫眼線都有難度，畫一陣就要抖抖，所以嚟緊佢準備抽時間去做瑜伽，伸展筋骨又可改善心情及睡眠質素。
梁馨蘭「乘機」飲咖啡提神
至於時裝設計師鄧達智都有失眠煩惱，幾年前佢去加拿大因為唔適應時差，由落機當晚開始一直失眠咗幾個月，成個人落晒形，好彩後來朋友推介佢用中藥調理，一瞓瞓足十七個小時，問題逐漸消失。為咗避免出現同樣情況，佢話依家就醒目喇，去遠程分幾程搭機，寧願飛耐啲，將時間調啱自己生理時鐘最重要。
同場仲有「紅Ａ」創辦人孫女梁馨蘭（Jessica）、家得路執董陳家偉、廖創興家族後人廖偉芬等。對於不時公幹飛長途機，陳家偉話會逼自己盡量喺香港時間先休息，好似佢知道大約六點鐘返到香港落機，前一晚就計好大約香港時間晚上九點先於機上瞓覺，而Jessica同廖偉芬就靠飲啡提神，調節休息嘅鐘數。
卓妮