政情：中環出更：立會秘書處青黃不接難「安」枕
立法會秘書處近日流失大量人手，法律事務部第一把交椅法律顧問馬耀添將會喺今年年中退休，副秘書長林鄭寶玲（Justina）亦會喺差唔多時間退休。雖然秘書處尋日宣布，委任現任高級助理法律顧問馮秀娟為新法律顧問，但據聞Justina個位仲未物色到合適人選，加上有個助理秘書長職位又要請人，睇嚟秘書長陳維安（Kenneth）有排頻撲喇。
年屆半百 想身體健康
雖然秘書處流失多位猛將，但尋日仍有一大班同事趁下午開例行會議，特別為Kenneth慶祝踏入五十歲知命之年。話說當立法會主席曾鈺成行入會議室後，幾個管事推住一個插有蠟燭嘅蛋糕進入會議室，原來秘書處一班職員知道Kenneth生日，於是夾計買個蛋糕幫佢慶祝，令佢喜出望外。
Kenneth話，生日願望一定係身體健康，又希望秘書處咁多位職員可以開開心心上班，快快樂樂返屋企，唔使做得咁辛苦喎。
卓妮