立法會超級區議會議席一直係各黨兵家必爭之地，公民黨（公文袋）前立法會議員陳淑莊（Tanya）亦被視為下屆熱門參選人之一，可惜佢一直無表態有冇意攞「超級入場券」。公文袋尋日舉行傳媒茶敍，秘書長賴仁彪大爆黨內有一條「徵召機制」，可以隨時指派任何人出選區議會。換言之，如果公文袋真係無人選超級，Tanya分分鐘要焗住上轎代黨出征。
公文袋黨魁梁家傑被問到會唔會派人選超級時話，雖然該黨一直主張廢除功能組別，但係基於現實都要派人出選，務求要做到寸土必爭。賴仁彪就爆肚話，雖然有意參選區議會嘅黨員要先通過黨內遴選機制，但執委會仍然可以喺最後一刻徵召指定人士出選。咁會唔會引用呢個「徵召機制」要求Tanya「出山」選區議會呢？賴仁彪話，勉強無幸福，如果Tanya真係唔想，佢哋都唔可以夾硬嚟喎。