中環出更：老婆去倒數 星爺被禁足
尋日沙田馬場舉行元旦賽馬日，好多馬迷入場落番幾注碰碰運氣，亦有唔少名人帶埋親友一齊入場感受氣氛。立法會議員吳亮星罕有地同老婆拍拖入場，支持佢哋有份嘅團體馬。講到除夕夜點慶祝時，星爺自爆太太唔畀佢出去，驚佢咳嗽情況加重，但係太太就約咗朋友出去玩，結果星爺獨自一人喺屋企倒數跨年，認真陰功。
早前我哋講過，星爺喺佔領期間患上感冒，至今仍然未清，自嘲正處於「後感冒時期」。星爺話，太太驚佢除夕夜出去人多擠迫嘅地方，空氣唔好會令咳嗽情況加重，於是佢就留喺屋企。咪以為佢同太太齊齊喺屋企倒數一樣咁甜蜜，其實太太約咗一班朋友去「九龍蘭桂坊」慶祝，星爺惟有獨自留家中。好彩佢住喺中環，窗外望到維港煙花，所以一樣咁享受。講到新一年嘅願望，佢話最緊要工作順利、社會安定。
施榮忻期許民困早解決
佳能香港副總裁鄧慶治兒子鄧振豪（Chandler）及新婚太太Giselle都有入場，已有一個囡囡嘅佢哋今年似乎要忙住湊B，未來一年都唔會急住追多個，希望大家都身體健康、快快樂樂。百仁基金前主席施榮忻就話，新一年希望社會積累嘅民生問題早啲解決，例如多啲興建房屋租畀年輕人咁話。
中華廠商聯合會新上任嘅副會長戴澤良與太太羅台秦、副會長吳清煥等人拍住入場為出賽馬匹打氣，結果隻馬跑第四名，眾人皆喜出望外，事關佢哋希望隻馬留喺第四班，結果有錢收又唔使升班，開心晒。
卓妮