政情：遊韓睇紅葉 梁世華償願
遊韓國睇紅葉，都要講吓彩數。去年錯過機會嘅中華廠商聯合會前行政總裁梁世華（Paul），今年捲土重來，早前同太太Marianna去韓國賞楓勝地內藏山，結果成功如願。
勁食炸醬麵
為咗睇全韓第一嘅楓葉山，阿Paul及太太坐足四個鐘車，抵達後果然別有洞天，抬頭一看，漫天紅葉，十足拍劇咁浪漫。阿Paul同太太好興奮拎起手機左影右影，老友睇見啲相都話要拎番幾張做手機背景圖片喎！
首爾入冬後夜晚氣溫急降，得番幾度，阿Paul雖然有備而來，仍然凍到腳震震，幸好日間有陽光頂得住。幾凍都好，佢心知太太鍾意食炸醬麵，冒寒陪佢左逛右逛，食完一間又一間，然後撐住肚皮返酒店，臨走前再狂掃柿餅做手信。阿Paul自言做咗退休人士後，使錢要慳住，所以佢唔敢炒股，怕蝕到渣都無，寧願投資債券及基金收吓息，印印腳歎世界。