政情：白鴿靠政改擋狙擊

上屆區選攬炒

人力喺上屆區議會選舉派出約三十人狙擊支持政改方案嘅白鴿黨同民協嘅候選人，仲以「票債票償」為口號，要求兩黨為支持新增超級區議會議席嘅政改方案付出代價，令區議會選舉首次出現泛民「自相殘殺」。雖然最後喺對撼下人力一席都贏唔到，但已經累到兩黨雞毛鴨血，當選同得票都錄得負增長，付出沉重代價。

下屆區議會選舉明年底舉行，正當各政團積極喺各區插旗之際，人力亦都諗緊區選策略，當中首要考慮嘅就係會否再派人落區狙擊白鴿黨。經過討論，據聞大家認為由於白鴿黨已經簽咗政改承諾書，表明反對任何有篩選嘅政改方案，同人力立場一致。正因為白鴿黨有咗呢道政改「護身符」或「擋箭牌」，加上泛民主派喺佔領行動一役後元氣大傷，人力於是決定暫時唔派人狙擊白鴿黨，費事被人話佢哋一時一樣。

不過，有人力中人話，由於白鴿黨有反口覆舌前科，人力要等立法會否決政改方案後，先可以確定唔狙擊白鴿黨，如果白鴿黨再好似上屆咁臨時轉軚撐政改，佢哋一定會出盡全力狙擊，甚至要白鴿黨亡黨都在所不計喎。

另外，佔領行動催生一批泛民主派嘅「雨傘仔女」，有人力成員話，雖然呢班「雨傘仔女」唔多鍾意政黨，但由於佢哋形象清新，加上有網民近日高調話要參選區議會，挑戰每屆都係靠自動當選食胡嘅建制派議員，人力正打算接觸呢班生力軍，以佢哋參選區議會嘅經驗教呢班新人點參選，希望可以幫人力吸納新一批支持者喎。