中環出更：樹根自創「燙手山薯」爆笑
立法會議員鍾樹根不時講錯嘢，帶畀大家好多歡樂，尋日佢出席電台節目時又有佳句。話說身兼立法會資訊科技及廣播事務委員會成員嘅樹根鬧爆港台，細數港台管理不善兼大花筒，唔怪得廣播處處長公開招聘半年來，都未有人想做，因為個位係燙手山「薯」喎！樹根失驚無神將山芋變成山薯，難為三位電台主持人都忍住唔笑，真係好搞笑。
話亞視「進步維谷」
咁仲未夠，樹根做完節目後，就將訪問錄音擺上網站分享，仲留言話「ATV進步維谷」，事關佢喺訪問中講咗唔少亞視欠薪及續牌危機。不過今次樹根又再寫錯字，將進退維谷變成進步維谷，隨即引起網民一陣嘲笑，有人話佢如果證實有讀寫障礙，大家就唔好再笑佢喎！
樹根咁失魂，可能係被港台數極都數唔晒嘅問題激親。佢話，曾建議港台將珍貴嘅菲林或膠卷寄放喺電影資料館，將來要用隨時拎嚟用，唔使花咁多錢搞電腦儲存中心，但港台就話，儲存喺人哋度都有版權問題喎。佢又批評港台以公帑營運，但就變成反政府喉舌，行政上有好多掣肘，邊有人夠膽做處長？
卓妮