渡海濠情：三高四低 擇偶條件
日本囡囡最新嘅擇偶條件就係要「三高四低」，三高係指身材高、學歷高同埋收入高，至於四低就係依賴低、風險低、姿態低同埋消費低，嚟自大富豪桑拿嘅玲玲就話：「我覺得三高都其次，四低至係如今搵男友嘅新標準！」
日日湊仔
玲玲話：「家陣新一代嘅年輕人，個個都係草食男，平常生活唔好話照顧女朋友，經常連照顧自己都有問題，好多時同佢哋出街，都要我哋做女朋友嘅照顧番佢哋，而且一旦照顧得佢哋妥妥當當，日後大小事都會依賴晒你，到時日日湊仔，真係做女友變咗做人阿媽，唔考慮呢點真係唔得！至於風險，就係揀男朋友一定要忠厚老實，令一腳踏兩船或者被始亂終棄嘅機會降至最低，呢方面真係不可掉以輕心，感情生活好與壞全睇呢一點，加上男朋友一般情況下係冇樣睇嘅，外表點樣忠厚老實嘅都有可能行差踏錯！所以除咗要考慮男友本身嘅條件同埋心態外，做女朋友嘅都要自己落多少少工夫，例如要嚴加管教，唔好以為佢哋老實就放軟手腳，否則後悔嘅只會係自己。」
脾氣要好
真係好有道理，剩低落嚟仲有兩點呢？玲玲話：「至於姿態低，就係要男朋友脾氣要好，EQ要高，否則動不動就肝火上升，大家兩天一小吵，三日一大吵，感情生活又點會好，除咗脾氣外，心態上太過大男人都好唔掂，因為太過大男人，佢哋就會成日管住你，去邊度玩？同邊個玩？問個不停，最差連使咗幾多錢都管住你，呢啲男人真係唔要得！至於最後一點就係消費低，男朋友收入多少並不重要，有啲人搵幾多就使幾多，咁佢搵到幾多對我都冇用，但如果佢本身消費低，搵一萬只使兩千，餘下八千可以供我哋使用，咁就唔同呀！當然，如果佢收入又高，而消費又低，咁就冇得頂啦！但有時做人唔好太貪心，收入高和消費低如果要我二選一，我係一定會選消費低嘅！」
玲玲Profile
年齡：22歲
三圍：34-24-34
撰文：小德
攝影：阿生