政情：金金大師 成立「本土」社團
一場佔領運動，令本土陣營進一步抬頭成形。外號「金金大師」嘅北區水貨客關注組召集人梁金成，憑住反水貨客同港人優先呢兩招，成功吸納唔少支持者，最近佢決定再另起爐灶，向警方申請成立名為「本土」嘅社團。
社交網上載註冊證明書
關注組尋日於社交網站上載一張社團註冊證明書，社團名稱一欄係「本土」兩個字，英文名稱為「The Local」，印象中唔少團體組織都打正本土旗號，但偏偏組織名稱直接用上本土兩個字嘅少之又少，加上適逢區議會換屆選舉明年底舉行，唔知金金大師同佢嘅支持者會否放手一試，以本土名義出選測試支持度呢？