香港最近因佔領行動搞到滿城風雨，照計做政府高官應該忙於撲火，不過財政司司長曾俊華（鬍鬚曾）撞啱最近兩個多月頻頻外訪，尋日就喺網誌自爆到訪中東時獲杜拜酋長禮待，酋長仲喺沙漠地帶嘅私人別墅宴請佢，唔知鬍鬚曾喺中東期間，有無「身在中東，心在金鐘」呢？
佔領行動持續七十多日先至曲終人散，鬍鬚曾最新網誌自爆過去七十幾日，先後走訪美國、歐洲、澳洲同中東，足迹遍及七個國家，共十一個城市，而無論身在何方，心裏都不斷記掛香港情況，好似今次從中東回來，知道金鐘幹道喺冇衝突情況下重新通車，令佢暫時放下心頭大石。
不過，鬍鬚曾口說外訪期間一直關心香港情況，之不過有辦你睇，教育局局長吳克儉被踢爆經常外訪周圍飛，有議員隨即狙擊吳，要求交代外訪花費同成效，因此話唔定議員遲吓會轉移目標窮追狂打鬍鬚曾，睇怕鬍鬚曾準備定標準答案都得嘞！