政情：五部曲等43年 蔣麗芸靠嚇？
向來言論出位嘅立法會議員蔣麗芸（阿Ann），前日喺社交網站發表名為「東方之珠的故事」嘅評論文章，指中央願意畀港人一人一票真普選之時，泛民主派發動佔領行動同公民抗命，搞到唔同政見嘅市民各走極端，令社會嚴重撕裂，其後更加話可能要去到二○五七年，由今日喺九十後出任首長先至會重啟政改五部曲。
周浩鼎解決社會撕裂有計
身為港府首長嘅特首，按道理每五年都可以重啟政改五部曲一次，阿Ann提及嘅二○五七年，距今有四十三年，同時跨越九七回歸後嘅五十年不變時間，莫非佢想嚇人，希望特別係泛民中人停一停、諗一諗政改原地踏步嘅後果？
講開社會因佔領行動嚴重撕裂，離島區議員周浩鼎出席一論壇時話，停止社會撕裂可以由個人做起，方法就係喺社交網站facebook上重新加番之前因為政見不同而「unfriend」（取消交友）咗嘅朋友帳號。解決社會嚴重撕裂當真咁簡單，真係信不信由你！