政情：真普聯勢摺埋 鄭宇碩等收山

風光不再 可有可無

港府近日放風話可能延至明年一月才進行政改第二階段諮詢，但基於泛民一早講明會杯葛諮詢，如果此言屬實，變相就係廢咗真普聯武功。鄭宇碩尋日話，經歷佔領行動後，泛民已由過往行談判路線改為發動一系列抗爭行動，包括喺立法會內發起不合作運動，以拖垮政府施政為目的，而唔係好似以前咁透過對話解決問題。

佢坦言，真普聯依家喺泛民平台上已經扮演唔到任何角色，又話雖然近排真普聯仍然有不定期開會，但會上都係純粹分析下當時形勢，令真普聯由過往團結泛民嘅重要組織淪為吹水會，查實真普聯淪為吹水會前，都曾經有一段風光嘅日子，最成功一役係真普聯提出包括公民提名、政黨提名同提名委員會提名在內嘅「三軌方案」，成功喺今年六月進行嘅民間全民公投，力壓學界同人民力量方案成為大贏家，風頭一時無兩。

不過政治一日都嫌長，經歷佔領行動等事件後，真普聯依家已經淪為一個可有可無嘅組織，鄭宇碩率先放風話稍後會徵詢真普聯成員意見，睇下使唔使索性摺埋真普聯，等泛民可以專注繼續抗爭；至於身為召集人嘅佢會否轉換平台繼續參與政改工作，鄭宇碩擬知所進退，爆出一句「過咗六十五歲就應該退休」，似乎鄭有晒心理準備，只要時機一到，隨時全身而退都不成問題。