中環出更：白鴿新同盟換屆 新瓶舊酒
佔領運動令學界代表彈出，唔少青年人都蠢蠢欲動想喺所屬政黨政團擔當更重要角色，之不過民主黨（白鴿黨）同主要由早年退出白鴿黨成員組成嘅新民主同盟（新同盟），尋日舉行領導層換屆選舉繼續新瓶舊酒，幾乎大部分人都係熟口熟面。
首先白鴿黨主席方面，雖然可以「四揀一」，不過經過兩輪投票後，最終劉慧卿以一百七十一票，以廿六票之差擊敗獲得一百四十五票嘅胡志偉，再度當選黨主席。兩名副主席方面，南區區議員羅健熙成功連任，葵青區議員尹兆堅亦以大比數擊敗吳永輝當選新任副主席。中委方面，據知唔少卿姐支持者都高票當選，包括前西貢區議員柯耀林得到二百五十票，以最高票當選。尹兆堅成功當選後都承認，白鴿黨喺佔領運動出人力物力，但畀人感覺冇乜參與，承認同年輕人接連唔上。既然知道問題所在，要諗下有無新橋至得嘞。
白鴿黨大格局冇改變，新同盟亦都一樣，十二名召集人、執委等職位中，大部分都係舊人，包括當然執委范國威。
卓妮