中環出更：髮師義剪 大放正能量
亞洲髮型大師Kim Robinson尋日將髮廊關門一天拉隊做義工，聯同六名歌連臣角懲教所在囚青年，到訪國際婦女會長者鄰舍中心，為九十名長者義剪；當睇見在囚少年落足心機學嘢，埋頭苦幹剪髮，Kim不禁流下男兒淚，鼓勵犯過錯嘅青年唔好放棄，只要肯改過自新，學習一技傍身，將來成就叻過佢都唔定。
勉勵在囚青年
懲教署同國際婦女會合辦嘅「飛短留長」義剪活動，今年係第二年舉行，聽見Kim到訪，中心一位七十歲長者吳女士，第一個舉手做模特兒。Kim亦爽快答應露兩手，見佢揮動「魔剪」，十五分鐘就搞掂。吳女士望見鏡中新形象，哈哈大笑話「我睇落似四十歲」。Kim其後用自身經歷勉勵青年，自言年幼時家境清貧，如果唔係學會剪髮躍身世界舞台，如今仍係「鄉下佬」一名。
國際婦女會主席彭徐美雲話，搞義剪日旨在讓長者剪個靚髮過聖誕︰「唔少長者為慳錢，一年都未剪過頭髮，今次有人幫佢哋扮靚，長者們開心咗好多晚。」
幫長者扮靚靚
僑界社團聯會名譽會長鄧慕蓮則話，佢幫襯Kim剪髮三年，得知Kim有意服務長者，拍心口贊助活動之餘，仲送出逾百個福袋，同班長者提早過開心聖誕。
另一合辦單位代表、懲教署署長單日堅都有帶埋太太黃嘉敏（Carmen）撐場，據知單Sir返埋平安夜就退休，Carmen笑言今個平安夜，應該係最平安的一年喎。
卓妮