中環出更：清「鐘」後急蒲頭 棠哥博領功
佔領行動持續七十幾日，好多建制派潛晒水，包括行政會議成員鄭耀棠（棠哥）。但係前日「鐘」極清場後，棠哥就即刻現身鎂光燈下，一連兩日點評佔領行動兼支持政府。尋日佢以嘉賓身份出席一個活動時，仲主動排隊同傳媒講嘢「博領功」，唔通真係正如我哋前日所講，怕畀北京懲罰？
風頭被搶 吳秋北黯離場
我哋前日講過，北京對建制派就佔領行動發聲，講明會「賞罰分明」。唔知係咪因為咁，近幾個月唔見影嘅棠哥，清場後接連大讚警隊表現專業、忍耐，批評有人口講爭取民主，實際上就係製造麻煩，奉勸大家回到現實，把握政改第二輪諮詢嘅機遇表達意見咁話。見棠哥講得咁開心，真係好好「戲」。
工聯會理事長吳秋北亦有到場，但講到搶風頭，好明顯就唔夠棠哥叻。吳秋北代表工聯會加入保普選、反佔中大聯盟，仲發起過兩次大規模簽名運動，凝聚咗反佔中民意，但尋日棠哥發威，佢只能黯然離場。
卓妮