渡海濠情：人馬男人 天生愛玩

筋疲力盡

小琪話：「我前一任男朋友就係人馬座嘅，佢嘅體力真係用之不盡，特別係玩嘅時候，佢真係可以由朝玩到晚，例如我哋一放假，佢一早就會捉我去戶外做運動，唔係踩單車就係行山，玩個零鐘我雙腳就已經抽晒筋，但佢仲有大把體力，玩完一個上晝，我已經辛苦到出唔到聲，如果約咗朋友，佢就會去踢踢波或者打打籃球，但咪以為坐喺旁邊就好舒服，畀太陽曬住兼且一早起身，我真係驚會中暑呀！幾經辛苦捱到下午，以為會放你走，點知佢已經安排好節目，好在都係喺大商場內進行，例如買吓嘢或者睇吓戲，講真同佢睇咁多次戲，我都係入場瞓覺，因為上晝體力消耗太大，唔趁機會眠一眠，之後啲節目點捱落去呀！無錯吖！到夜晚佢又會換另一批朋友，一直玩到半夜！」

草草了事

鐵人都頂唔順啦！小琪話：「咪睇我弱不禁風咁樣，其實我都算捱得，但同佢去玩一日真係瞓番三日都補唔番，有時等成個星期至見佢一日，我只想多啲二人世界，但你試諗吓，畀佢咁樣糟質咗成日，半夜三更返到屋企，個人已經攰到乜嘢性趣都冇晒，男朋友意猶未盡，要求同我親熱，我亦只能草草了事，佢由朝玩到晚當然開心，但我就比做苦工更加辛苦，咪以為佢唔出街玩就會冇事，有時天氣唔好，佢焗住喺屋企陪我，佢會叫朋友嚟打電腦或者打麻雀，跟住再嚟個大食會，全程要我招呼之外，仲要我嚟負責善後，你話係咪慘過返工，所以最後都係要同佢分手，有人會話你咪唔好陪佢玩囉！但佢身邊咁多朋友，好易畀人搶走，所以愛上人馬座嘅男生真係要諗過先！」

人馬座11/22-12/21

人馬座特質：沉迷玩樂

十二星座中最喜歡玩嘅星座一定係人馬座，佢哋只要有得玩就精神，而且有時可以離譜到工都唔返，而做佢另一半，咪以為可以置身事外，佢哋除咗喜歡玩，仲喜歡呼朋喚友咁去玩，如果你唔去，感情肯定難以發展落去。

人馬座下周情愛運程

狩獵運：4

甜蜜運：3.5

戰鬥運：5

小琪Profile　　

年齡：21歲

三圍：34-23-34

撰文：小德　

攝影：阿生