考考大家︰黃之鋒同周一嶽有咩共通點？你可能會話，兩個人一個瘦一個肥，一個嫩一個老，除咗一樣咁鍾意搞搞震之外，好似大纜都扯唔埋喎。好嘞，等功夫茶開古啦，原來佢兩個校友嚟o架。
即係咁，Gphone哥搞群眾運動就話叻啫，讀書就認真麻麻嘞──不過諗諗吓又唔可以咁講，你知啦，Gphone哥咁有深度，連外國著名雜誌都選佢為「全球百大思想家」，錄取佢嗰間大學簡直係「慧眼識英才」。唔係講笑，呢間大學眼光真係好鬼獨到，尋日公布榮譽博士名單，其中就有周一鑊份，而且咁啱得咁蹺，一樣都係社會科學，所以攞起算盤計吓數，Gphone應該叫周一鑊一聲「師兄」至啱。
講到呢度，功夫茶真係冇法子唔寫個「服」字。一個發動佔領之亂搞到香港雞毛鴨血，另一個更加係「每周一鑊」嘅害人蟲，兩件都係三尖八角嘅另類好漢，呢間大學咁都啃得落，都算重口味咯。
不過話又講番轉頭，周一鑊呢個榮譽博士，又確係實至名歸嘅。呢，佢領銜嘅平機會可能得閒得滯，最近就性別、殘疾、家庭崗位同種族歧視條例檢討進行公眾諮詢，結果引發滿城風雨，全城鬧爆，特別係加入「事實婚姻」，鼓吹同志平權，搞到「撐同」「反同」大火併，連僱主都忍唔住出聲，話擔心將來要為同居嘅員工提供埋配偶福利，增加經營成本。至於引入所謂「族內歧視」，將新移民同內地人當成有別港人嘅另外一個族群，就更加係九唔搭八。正如有學者話齋，家陣中港矛盾咁尖銳，以為訂立反歧視法例就萬事大吉，唔單止太傻太天真，倉促提出修例甚至可能弄巧反拙，激化矛盾，結果咪不幸言中囉。
唉，呢啲咪叫陸雲亭睇相，唔衰攞嚟衰囉。依家社會已經夠晒分化，夠晒撕裂，周一鑊好似慌香港唔死咁，踩多兩腳，市民真係多得佢唔少。你哋話嘞，單憑一隻鑊翻雲覆雨，竟然有本事搞到天下大亂，呢個現象係咪好值得社會學研究先，周一鑊嘅社會科學榮譽博士，係咪實至名歸先。
講嚟講去，一日最衰都係港府。周一鑊當年做食衞局局長咁耐，害足市民咁耐，好在香港人命硬，總算捱到佢做完任期，以為終於可以送走瘟神啦，點知港府竟然對呢塊廢舊電池情有獨鍾，係都要翻閹佢出掌平機會。所以話啫，香港社會真係好病態o架，好似周一鑊咁嘅瘟神，正常人見到佢匿都匿唔切，偏偏有人鍾意佢，重用佢，尊重佢，證明臭豆腐有價有市唔係冇道理o架！