政情：葉建源教中史 講古佬上身
中國歷史源遠流長，唔同朝代又各具特色，但中史呢科過去畀人印象要死記硬背，令唔少學生卻步，教育界立法會議員葉建源話，其實中史老師以「講古仔」形式教中史，學生就會較易消化，當年佢讀書時就係因為中史老師呢個教法，令佢對中史產生濃厚興趣。
讓年輕人認識祖國
咁仲唔止，葉建源話之後到佢自己為人師表時，教中史科時都照辦煮碗，一於「講古佬」上身，當中史係一個古仔咁講。佢認為，如果老師教得好，中史科喺初中階段可以吸納好多粉絲，年輕一輩可以好好認識祖國，了解國家喺幾千年來嘅演變，仲可以領悟唔少做人同管治嘅道理。
不過，依家文憑試報考中史嘅學生人數買少見少，葉建源講到呢度都好無奈。其實如果多幾個中史老師學吓「講古仔」呢招，話唔定可以令中史科「起死回生」。