政情：史泰祖伉儷 懷舊「帽」會

醫學會會長史泰祖平日公務繁忙，但有時都要忙裏偷閒，佢上周應澳門美國商會朋友邀請，同太太一同到澳門參加懷舊舞會。該會場以十九世紀年代美國爵士樂為布置主題，史醫生話當時同太太貪得意借咗大會提供嘅黑色禮帽嚟影相。至於張相點解係黑白相，佢話自己本來係影開彩色相，但認為黑白相最堪玩味。之不過快樂時間過得特別快，加上仲有好多公務要處理，史醫生同太太出席完舞會後，就即刻搭船返香港，無再喺澳門周圍行吓。