政情：毛乃議員助長鳩佔
旺角「鳩嗚團」夜夜出遊，對區內居民、商戶造成嚴重滋擾，有份申請佔旺區禁制令嘅潮聯小巴站頭更成為「鳩嗚團」必到之地，有市民要求警方抄牌處理小巴違例泊車，另有人喺網上號召聖誕節圍攻旺角同立法會，其實以上兩種行為都唔應該鼓勵，不過兩名泛民議員毛孟靜（阿毛）同莫乃光（Charles）疑齊齊助紂為虐，前者要求警方處理潮聯小巴違泊，隻字不提「鳩嗚團」滋擾民生，後者亦只將重點放喺五千市民聯署停止濫用，立即檢討「有犯罪或不誠實意圖取用電腦」嘅罪名，有關做法係咪令人信服，答案相信呼之欲出！
阿毛同Charles最近先後去信立法會交通事務委員會主席田北辰（田二少）同政府當局，要求跟進佔領行動衍生嘅新問題，其中阿毛喺信中話潮聯小巴於旺角通菜街違泊多年，警方一直縱容，從未認真執法，又話連續多晚，有唔少市民到場要求警方抄牌執法，警方卻反指市民非法集結，對潮聯違法行為視若無睹，因此要求召開特別會議緊急討論此事。
唔提商戶受影響
不過，本身循九龍西進入立會嘅阿毛，成封信一個字都無提「鳩嗚團」對附近商戶造成嘅影響。田二少話，唔想將潮聯申請禁制令同要求召開特別會議兩件事拉埋嚟講，又話小巴、貨車違泊全港都有，單就潮聯小巴違泊而召開會議「有啲怪」；再者阿毛只要求警方處理潮聯違泊，隻字不提「鳩嗚團」滋擾民生，田二少質疑阿毛係咪雙重標準。
身為交通事務委員會委員嘅工聯會王國興亦批評，阿毛嘅做法落井下石，「無非都係幫非法集結者迫害小巴司機」，反建議阿毛若真係關心交通問題，應該先叫阿毛所屬嘅公民黨撤退佔區，拔走佢哋喺佔領區嘅旗幡，唔好喺度做埋啲無謂嘢！
對於Charles批評當局唔係提交涉及不誠實意圖取用電腦個案資料，質疑係咪有乜隱瞞，王國興批評Charles做法不負責任，分分鐘誤導市民以為有關網上號召嘅違法行動係合法，希望佢唔好再幫示威者留難警方。